قانون ہاتھ میں لینے والوں کیخلاف سخت کارروائی ہوگی: گورنر خیبر پختونخوا

گورنر خیبر پختونخوا فیصل کریم کنڈی نے صوبے کے عوام کے نام ایک اہم اور خصوصی پیغام جاری کرتے ہوئے واضح کیا ہے کہ امن و امان خراب کرنے اور قانون اپنے ہاتھ میں لینے والوں کے خلاف بلاامتیاز سخت قانونی کارروائی کی جائے گی۔ انہوں نے کہا کہ کے پی کے عوام صدارتی پروکلیمیشن کا خیرمقدم کرتے ہیں اور صوبے میں امن، استحکام اور خوشحالی کے خواہاں ہیں؛ عوام نے فیصلہ کر لیا ہے کہ وہ مزید فتنہ الخوارج کا ساتھ نہیں دیں گے بلکہ سیکیورٹی اداروں کے شانہ بشانہ کھڑے رہیں گے۔ گورنر کے پی نے شہریوں کو کسی بھی قسم کی قانون شکنی، اشتعال انگیزی اور دنگے فساد سے مکمل اجتناب کی ہدایت کرتے ہوئے کہا کہ خیبر پختونخوا کے عوام امن پسند ہیں اور تمام صوبوں کے ساتھ برادرانہ تعلقات و باہمی تعاون کے ذریعے جمہوری اقدار اور ترقی کے ثمرات عام شہری تک پہنچانا چاہتے ہیں۔