وفاقی حکومت کا خیبر پختونخوا کے نامزد اضلاع میں ایریا ڈیویلپمنٹ سیکرٹریٹ قائم کرنے کا حکم

وفاقی حکومت نے خیبر پختونخوا میں ایمرجنسی کے نفاذ کے بعد حساس اور متاثرہ 12 نامزد اضلاع (ڈیرہ اسماعیل خان، ٹانک، لکی مروت، بنوں، باجوڑ، مہمند، خیبر، کرم، اورکزئی، شمالی وزیرستان، جنوبی وزیرستان اپر اور جنوبی وزیرستان لوئر) میں امن و امان، شہریوں کے تحفظ، بہتر طرزِ حکمرانی اور ترقیاتی کاموں کی بلا تعطل انجام دہی کے لیے ہنگامی بنیادوں پر ‘ایریا ڈیویلپمنٹ سیکرٹریٹ’ (ADS) کے فوری قیام کا احکامات جاری کر دیے ہیں۔ وفاقی حکمنامے کے مطابق سیکرٹریٹ ‘ایریا ریپریزنٹیٹو و ڈیویلپمنٹ کونسل’ کی نگرانی میں کام کرے گا، جبکہ ایڈیشنل چیف سیکرٹری خیبر پختونخوا (نامزد اضلاع) اس سیکرٹریٹ کے سربراہ اور ان اضلاع کے بااختیار ایڈمنسٹریٹر ہوں گے۔ ایڈمنسٹریٹر کو ان اضلاع میں تمام انتظامی، سول، پولیس اور امن و امان سے متعلق وسیع اختیارات سپرد کیے گئے ہیں، جن کے تحت وہ فنڈز کی منتقلی، اداروں کی تنظیمِ نو، اور مسلح افواج و وفاقی اداروں کے ساتھ رابطہ کاری کے مجاز ہوں گے۔ ان کے تمام احکامات کو صوبائی حکومت کے فیصلوں کے مساوی قانونی حیثیت حاصل ہوگی اور یہ حکمنامہ فوری طور پر نافذ العمل کر دیا گیا ہے۔