خیبرپختونخوا میں گورنر راج اور ایمرجنسی کے نفاذ کو مسترد کرتے ہیں: مولانا فضل الرحمان

جمعیت علمائے اسلام (ف) کے سربراہ مولانا فضل الرحمان نے خیبر پختونخوا میں گورنر راج اور ایمرجنسی کے نفاذ کو مکمل طور پر مسترد کرتے ہوئے اس کے خلاف بھرپور سیاسی حکمت عملی مرتب کرنے کا اعلان کیا ہے۔ انہوں نے کہا کہ نائب وزیراعظم اسحاق ڈار نے انہیں فون پر صوبائی حکومت کے عدم تعاون کا جواز بنا کر ایمرجنسی سے آگاہ کیا تھا، تاہم انہوں نے سوال اٹھایا کہ اگر یہی فارمولا ہے تو پھر ایمرجنسی وفاق یا بلوچستان میں کیوں نافذ نہیں کی جاتی۔ مولانا فضل الرحمان نے انکشاف کیا کہ انہوں نے پی ٹی آئی قیادت (سہیل آفریدی، بیرسٹر گوہر، اسد قیصر) اور وزیراعظم کے درمیان ثالثی کا کردار ادا کرتے ہوئے بانی پی ٹی آئی سے ملاقات، علاج اور لانگ مارچ کے خاتمے پر اتفاق رائے پیدا کرایا تھا، لیکن حکومت اپنے وعدوں سے مکر گئی۔ انہوں نے انسدادِ دہشت گردی کی حکومتی پالیسی اور سابقہ ملٹری آپریشنز کے نتائج پر شدید تنقید کرتے ہوئے پیپلز پارٹی کو بھی ہدفِ تنقید بنایا اور کہا کہ جمہوریت کے دعویداروں نے آئین کو دفن کر کے تیسری بار گورنر راج مسلط کر دیا ہے۔