پی سی بی کا بڑا فیصلہ، پاکستان چیمپئنز کو ڈبلیو سی ایل میں شرکت سے روک دیا

پاکستان کرکٹ بورڈ (پی سی بی) نے ورلڈ چیمپئن شپ آف لیجنڈز (WCL) کے نئے سیزن کے لیے ‘پاکستان چیمپئنز’ کو ایونٹ میں شرکت سے روکتے ہوئے نو ابجیکشن سرٹیفکیٹ (NOC) دینے سے صاف انکار کر دیا ہے۔ ذرائع کے مطابق پی سی بی اپنے گزشتہ سال کے موقف پر قائم ہے اور اس نے ایک ہفتہ قبل ہی انتظامیہ کو این او سی کی عدم فراہمی سے آگاہ کر دیا تھا۔ پی سی بی کے اس فیصلے کے بعد پاکستان چیمپئنز آج بنگلہ دیش کے خلاف اپنا شیڈول میچ بھی نہیں کھیل سکے گی۔

ذرائع کے مطابق پاکستان چیمپئنز کے تمام کھلاڑی اس وقت دبئی میں موجود ہیں اور ایونٹ کی تیاریوں میں مصروف تھے، تاہم این او سی نہ ملنے کے باعث وہ میدان میں نہیں اتر سکیں گے۔ یاد رہے کہ گزشتہ سیزن میں بھارتی ٹیم نے پاکستان چیمپئنز کے خلاف کھیلنے سے انکار کر دیا تھا، جس کے ردِعمل میں پی سی بی نے اس مرتبہ سیزن تھری کے لیے ٹیم کو عدم تعاون کی پالیسی کے تحت این او سی جاری کرنے سے روک دیا ہے۔