پاکستان کی کم عمر ترین آرچر عسوہ مرجان نے قومی پرچم بلند کردیا

پاکستان کی کم عمر ترین آرچر 14 سالہ عسوہ مرجان نے روس کے دارالحکومت ماسکو میں شاندار کارکردگی کا مظاہرہ کرتے ہوئے ملک و قوم کا نام روشن کر دیا اور قومی پرچم بلند کر دیا۔

عسوہ مرجان نے ماسکو میں منعقدہ انٹرنیشنل گریٹر ایشین ہارس بیک آرچری چیمپئن شپ میں حریف کھلاڑیوں کو سخت ٹکر دیتے ہوئے تیسری پوزیشن حاصل کی۔ اس عالمی مقابلے میں ان کا مقابلہ انڈونیشیا اور قازقستان کی ٹاپ اور تجربہ کار آرچرز کے ساتھ تھا، جن کے خلاف انہوں نے غیر معمولی صلاحیتوں کا مظاہرہ کیا۔

عالمی سطح پر ملک کا پرچم بلند کرنے پر روس میں تعینات پاکستانی سفیر فیصل نیاز ترمذی نے بھکر سے تعلق رکھنے والی نوجوان آرچر عسوہ مرجان سے خصوصی ملاقات کی اور ان کی اس شاندار کامیابی پر ان کی بھرپور حوصلہ افزائی کی۔ اس موقع پر پاکستانی سفیر کا کہنا تھا کہ عسوہ نے اتنی کم عمری میں شاندار پرفارمنس دے کر پوری قوم کے دل جیت لیے ہیں۔

واضح رہے کہ عسوہ مرجان اس سے قبل بھی مختلف عالمی مقابلوں میں اپنی عمدہ کارکردگی اور شاندار مہارت کی بدولت کئی اعزاز اپنے نام کرنے کا سہرہ رکھتی ہیں۔