ویران جزیرے پر 34 سال بعد بچے کی پیدائش

سکاٹ لینڈ کے انتہائی دور دراز اور ویران جزیرے ’نارتھ رونالڈسے‘ (North Ronaldsay) پر 34 سال کے طویل عرصے کے بعد بالآخر پہلی بار کسی بچے کی پیدائش ہوئی ہے، جس نے جزیرے کی گھٹتی ہوئی آبادی میں ایک نئی روح پھونک دی ہے۔

ڈنکن نامی یہ نومولود بچہ 15 ستمبر 2026 کو نارتھ رونالڈسے میں پیدا ہوا۔ یہ علاقہ اورکنی (Orkney) کا شمالی جزیرہ ہے جو محض تین میل لمبا اور دو میل چوڑا ہے۔ بچے کی والدہ ٹریل فورڈ (Trail Ford) اور ان کے منگیتر جارج سواریز اصل میں کوسٹا ریکا میں اس بچے کی پیدائش کی منصوبہ بندی کر رہے تھے، اور انہوں نے جزیرے پر پہنچنے کے بعد واپسی کے ٹکٹس بھی پہلے سے بک کروا رکھے تھے۔ تاہم، نارتھ رونالڈسے پہنچنے کے بعد حالات نے پلٹا کھایا اور انہوں نے یہیں بچے کی پیدائش کا فیصلہ کیا۔

والدہ ٹریل فورڈ کا کہنا تھا کہ “مجھے فوراً احساس ہوا کہ یہ دنیا کی سب سے خاص، جادوئی اور معاون پیدائش ہوگی جو میں اپنے بچے کو دے سکتی ہوں۔” دلچسپ بات یہ ہے کہ ٹریل فورڈ کے خاندان نے سال 1727 میں یہ جزیرہ خریدا تھا۔ انہوں نے مزید کہا کہ اس جزیرے کے ساتھ ان کا آبائی اور خونی رشتہ ہی انہیں ہر سال یہاں کھینچ لاتا ہے۔ انہیں لگتا ہے کہ اس جزیرے نے ان کی پرورش میں بنیادی کردار ادا کیا ہے، اور اسی وجہ سے انہوں نے یہاں کی پرسکون توانائی اور خاص طور پر اپنے آبائی گھر میں گہری اپنائیت محسوس کی۔

سکاٹش حکومت کے 2024 کے اعداد و شمار کے مطابق اس جزیرے کی کل آبادی 72 افراد پر مشتمل تھی، جو اب کم ہو کر صرف 51 رہ گئی ہے۔

جہاں تک اس سوال کا تعلق ہے کہ اتنے طویل عرصے تک اس جزیرے پر کوئی بچہ کیوں پیدا نہیں ہوا، تو اس کی بنیادی وجہ صحت کی سہولیات کا فقدان ہے۔ جزیرے پر نہ تو کوئی باقاعدہ ڈاکٹر ہے اور نہ ہی کوئی ہسپتال، بلکہ طبی ضروریات کے لیے صرف ایک مقامی نرس موجود ہوتی ہے، جس کی وجہ سے حاملہ خواتین عام طور پر قریبی شہروں کا رخ کرتی ہیں۔