برطانیہ: ڈاک یارڈ سے دوسری جنگِ عظیم کا بم برآمد، 300 سے زائد گھر خالی

برطانیہ کے ساحلی شہر فالمتھ (Falmouth) میں ایک ڈاک یارڈ کے قریب سمندری پانی سے دوسری جنگ عظیم کے زمانے کا مشتبہ بم ملنے کے دو روز بعد مقامی انتظامیہ نے 300 سے زائد گھروں کو خالی کرا لیا ہے۔ حکام کے مطابق فالمتھ ڈاکس کے قریب پانی میں تقریباً 250 کلوگرام وزنی امریکی بم کی نشاندہی ہوئی تھی، جس کے بعد علاقے میں فوری طور پر انتہائی سخت حفاظتی اقدامات نافذ کر دیے گئے۔

ڈیوون اینڈ کارنوال پولیس اور کارنوال کونسل نے خطرے کے پیش نظر جائے وقوعہ کے گرد 750 میٹر کا حفاظتی حصار (Cordon) قائم کر کے شہریوں کو محفوظ مقامات پر منتقل ہونے کی ہدایت کی ہے۔ بم ڈسپوزل ماہرین کی خصوصی ٹیمیں بم کا جائزہ لے رہی ہیں، جبکہ متاثرہ رہائشیوں کے لیے آل سینٹس چرچ میں عارضی استقبالیہ مرکز قائم کر دیا گیا ہے۔ حکام نے عوام کو علاقے سے دور رہنے اور ہنگامی خدمات کے اہلکاروں کے ساتھ مکمل تعاون کرنے کی ہدایت کی ہے۔