آئی سی سی رینکنگ: شوال ذوالفقار کی بڑی چھلانگ، پہلی بار ٹاپ 30 میں شامل

انٹرنیشنل کرکٹ کونسل (ICC) نے ویمنز ٹی ٹوئنٹی کھلاڑیوں کی نئی رینکنگ جاری کر دی ہے، جس میں پاکستان ویمنز کرکٹ ٹیم کی کھلاڑیوں نے شاندار کارکردگی کے باعث نمایاں پیش رفت کی ہے۔ پاکستان کی نوجوان بیٹر شوال ذوالفقار نے بیٹنگ رینکنگ میں 16 درجے لمبی چھلانگ لگاتے ہوئے 29 ویں پوزیشن حاصل کر لی ہے، جس کے ساتھ ہی وہ اپنے کیریئر میں پہلی بار ٹاپ 30 بیٹنگ رینکنگ میں شامل ہو گئی ہیں۔ قومی بیٹر عائشہ ظفر نے بھی زبردست بہتری کا مظاہرہ کرتے ہوئے بیٹنگ رینکنگ میں 31 درجے پیش رفت کے ساتھ 40 ویں پوزیشن سنبھال لی ہے، جبکہ آل راؤنڈرز رینکنگ میں 9 درجے ترقی کے بعد وہ 30 ویں نمبر پر آ گئی ہیں۔

بولنگ رینکنگ کی بات کی جائے تو پاکستان کی اسٹار اسپنر سعدیہ اقبال ایک درجے ترقی کے بعد عالمی درجہ بندی میں آٹھویں نمبر پر پہنچ گئی ہیں۔ قومی ٹیم کی کپتان فاطمہ ثنا نے بھی بولنگ رینکنگ میں 5 درجے بہتری حاصل کرتے ہوئے 24 ویں پوزیشن اپنے نام کر لی ہے۔ دوسری جانب بیٹنگ رینکنگ میں بھارت کی شافالی ورما چوتھے نمبر پر براجمان ہیں، جبکہ بالنگ رینکنگ میں بھارت کی شری چارانی پہلی اور دیپتی شرما دوسری پوزیشن پر برقرار ہیں۔