فیفا آسیان کپ، پاکستان کے 23 رکنی سکواڈ کا اعلان، کوچ ویزا تاخیر کے باعث کیمپ سے باہر

پاکستان فٹبال فیڈریشن (PFF) نے فیفا آسیان کپ (FIFA ASEAN Cup) کے لیے 23 رکنی قومی اسکواڈ کا باضابطہ اعلان کر دیا ہے۔ قومی ٹیم کی قیادت عبداللہ اقبال کریں گے جبکہ اسکواڈ میں تجربہ کار فارورڈ کلیم اللہ کی واپسی ہوئی ہے۔ اس کے علاوہ آذربائیجان کے نامور کلب قرہ باغ ایف کے (Qarabag FK) کے ساتھ 2 سالہ معاہدہ سائن کرنے والے پاکستان انڈر 17 ٹیم کے کپتان عبدالصمد کو بھی سینئر اسکواڈ کا حصہ بنایا گیا ہے۔ پی ایف ایف کے صدر سید محسن گیلانی نے جناح اسٹیڈیم اسلام آباد میں جاری تربیتی کیمپ کا دورہ کیا اور کھلاڑیوں کی حوصلہ افزائی کرتے ہوئے اس ٹورنامنٹ کو پاکستان کے لیے ایک تاریخی موقع قرار دیا۔

دوسری جانب، پاکستان فٹبال ٹیم کے ہیڈ کوچ نولبرٹو سولانو ویزا میں تاخیر کے باعث اسلام آباد میں جاری تربیتی کیمپ میں شرکت نہ کر سکے۔ رپورٹس کے مطابق ویزا کی غلط کیٹیگری میں درخواست جمع ہونے کی وجہ سے یہ تاخیر پیش آئی، اور اب وہ براہِ راست انڈونیشیا میں ٹیم کو جوائن کریں گے۔ ان کی غیر موجودگی میں اسسٹنٹ کوچز ٹائٹس برامبل اور ولید جاوید نے کیمپ کی نگرانی کی۔ فیفا آسیان کپ 25 ستمبر سے 5 اکتوبر تک کھیلا جائے گا، جہاں پاکستان کو گروپ بی میں تھائی لینڈ، فلپائن اور ویتنام کے ساتھ رکھا گیا ہے۔ پاکستان اپنا پہلا میچ 26 ستمبر کو تھائی لینڈ کے خلاف کھیلے گا۔