بنگلہ دیش: بلائنڈ ٹی20 ایشیا کپ 2026 کا شیڈول جاری

بنگلہ دیش میں منعقد ہونے والے ‘بلائنڈ ٹی20 ایشیا کپ 2026’ کا باقاعدہ شیڈول جاری کر دیا گیا ہے، جس میں ایشیا کی 5 بہترین ٹیمیں ٹرافی کے حصول کے لیے ایک دوسرے کے مدِ مقابل ہوں گی۔ اس بین الاقوامی ٹورنامنٹ میں میزبان بنگلہ دیش کے علاوہ پاکستان، بھارت، سری لنکا اور افغانستان کی بلائنڈ کرکٹ ٹیمیں شرکت کر رہی ہیں۔ ایونٹ کی شاندار افتتاحی تقریب 14 نومبر 2026 کو باؤشندھرا کرکٹ گراؤنڈ میں منعقد کی جائے گی۔

ٹورنامنٹ کے تمام لیگ میچز 15 نومبر سے 19 نومبر تک کھیلے جائیں گے، جبکہ فائنل معرکہ 20 نومبر کو ہوگا۔ پاکستان بلائنڈ کرکٹ ٹیم ایونٹ میں اپنی مہم کا آغاز 16 نومبر کو سری لنکا کے خلاف میچ سے کرے گی۔ شائقینِ کرکٹ کا سب سے بڑا اور سنسنی خیز مقابلہ پاکستان اور روایتی حریف بھارت کے درمیان 17 نومبر کو کھیلا جائے گا۔ اس کے بعد قومی ٹیم 18 نومبر کو میزبان بنگلہ دیش اور 19 نومبر کو اپنے آخری لیگ میچ میں افغانستان کا سامنا کرے گی۔