ثقلین مشتاق اپنے داماد شاداب خان کی سلیکشن کے لیے فون کرواتے تھے: توصیف احمد

پاکستان قومی کرکٹ ٹیم کے سابق چیف سلیکٹر توصیف احمد نے سابق ہیڈ کوچ ثقلین مشتاق پر سنگین الزامات عائد کرتے ہوئے دعویٰ کیا ہے کہ وہ اپنے داماد اور آل راؤنڈر شاداب خان کی قومی ٹیم میں سلیکشن کے لیے سفارشات اور فون کروایا کرتے تھے۔ توصیف احمد کا کہنا تھا کہ ثقلین مشتاق کو شاداب کے علاوہ کوئی دوسرا کھلاڑی نظر نہیں آتا، جبکہ ان کے پاس اس معاملے کی مبینہ فون ریکارڈنگز بھی موجود ہیں۔ سابق چیف سلیکٹر نے سوال اٹھایا کہ ٹیم سے باہر ہونے کے باوجود شاداب خان کو اتنی جلدی سینٹرل کانٹریکٹ کس بنیاد پر مل جاتا ہے؟

دوسری جانب، ثقلین مشتاق نے ان الزامات کو سختی سے مسترد کرتے ہوئے سوشل میڈیا پلیٹ فارم ‘ایکس’ (سابقہ ٹوئٹر) پر توصیف احمد کو کرارا جواب دیا ہے۔ ثقلین مشتاق نے کہا کہ وہ توصیف احمد کی بطور سینیئر عزت کرتے ہیں لیکن انہیں جھوٹ بولنے سے گریز کرنا چاہیے۔ انہوں نے کھلم کھلا چیلنج دیتے ہوئے کہا کہ توصیف احمد پہلے اپنی مبینہ ریکارڈنگز منظرِ عام پر لائیں، جس کے بعد وہ بھی اپنی موجود ریکارڈنگز سامنے لے آئیں گے۔ دونوں سابق کرکٹرز کے درمیان اس تنازع نے کرکٹ حلقوں میں نیا بحث و مباحثہ چھیڑ دیا ہے۔