ابھیشیک شرما نے افغانستان کیخلاف 30 گیندوں پر سنچری بنا کر ریکارڈ قائم کر دیا

بھارتی کرکٹ ٹیم کے بائیں ہاتھ کے جارح مزاج بیٹر ابھیشیک شرما نے افغانستان کے خلاف تیسرے ٹی ٹوئنٹی انٹرنیشنل میچ میں محض 30 گیندوں پر طوفانی سنچری اسکور کر کے فل ممبر ممالک (ٹیسٹ کھیلنے والے ممالک) کی جانب سے تیز ترین ٹی ٹوئنٹی سنچری کا نیا عالمی ریکارڈ قائم کر دیا ہے۔ بھارتی اننگز کا آغاز کرتے ہوئے انہوں نے افغان باؤلرز کا بھرکس نکال دیا اور صرف 34 گیندوں پر 11 چھکوں اور 9 چوکوں کی مدد سے 108 رنز کی دھواں دار اننگز کھیلی۔

ابھیشیک شرما نے 30 گیندوں پر سنچری مکمل کر کے زمبابوے کے سکندر رضا اور نیوزی لینڈ کے فن ایلن کا سابقہ ریکارڈ توڑ دیا، جنہوں نے 33، 33 گیندوں پر سنچری اسکور کی تھی۔ تاہم ٹی ٹوئنٹی انٹرنیشنل میں مجموعی طور پر تیز ترین سنچری کا عالمی ریکارڈ ایسٹونیا کے ساحل چوہان (27 گیندیں) کے پاس ہے جبکہ ترکیہ کے محمد فہد (29 گیندیں) دوسرے نمبر پر ہیں۔ میچ میں بھارت نے مقررہ 20 اوورز میں 7 وکٹوں پر 221 رنز بنائے، جس کے جواب میں افغان ٹیم صرف 94 رنز پر ڈھیر ہو گئی اور بھارت نے یہ سیریز 0-3 سے اپنے نام کر لی۔