پاکستان سکواش ٹیم اسلام آباد انٹرنیشنل ایئر پورٹ سے ناگویا جاپان روانہ

20ویں ایشین گیمز میں پاکستان کی نمائندگی کے لیے قومی سکواش ٹیم اسلام آباد انٹرنیشنل ایئرپورٹ سے ناگویا، جاپان کے لیے روانہ ہو گئی ہے۔ ایشین گیمز میں سکواش کے سنسنی خیز مقابلے 23 ستمبر سے 2 اکتوبر 2026ء تک جاری رہیں گے، جس میں پاکستان کے مرد اور خواتین کھلاڑی عالمی سطح پر اپنی صلاحیتوں کا لوہا منوانے کے لیے تیار ہیں۔

قومی مینز ٹیم میں نور زمان، محمد اشہب عرفان، ناصر اقبال اور محمد عاصم خان شامل ہیں، جبکہ ویمنز ٹیم میں ثناء بہادر، مہوش علی، سحرش علی اور ماہ نور علی کو منتخب کیا گیا ہے۔ ٹیم کے ہمراہ آفیشلز میں ایئر کموڈور (ریٹائرڈ) عامر نواز اور ہیڈ کوچ فہیم گل بھی جاپان روانہ ہوئے ہیں۔ قومی سکواش دستے سے میگا ایونٹ میں شاندار کارکردگی اور تمغے جیتنے کی قوی امیدیں وابستہ کی جا رہی ہیں۔