تیسرا ٹی ٹوئنٹی وہیل چیئر کرکٹ ایشیا کپ پاکستان سے نیوٹرل وینیو منتقل

تیسرا ٹی ٹوئنٹی وہیل چیئر کرکٹ ایشیا کپ پاکستان سے کسی غیر جانبدار (نیوٹرل) وینیو پر منتقل کر دیا گیا ہے۔ ایونٹ کی میزبانی اور منتقلی کے حوالے سے یہ اہم فیصلہ انٹرنیشنل کونسل آف وہیل چیئر کرکٹ (ICWC) اور پاکستان وہیل چیئر کرکٹ کونسل کے درمیان منعقدہ ایک مشترکہ اجلاس میں باہمی رضامندی کے ساتھ کیا گیا۔ فیصلے کے تحت پاکستان وہیل چیئر کرکٹ کونسل نے ایشیا کپ کی میزبانی کے تمام تر حقوق باضابطہ طور پر بین الاقوامی کونسل کو واپس سونپ دیے ہیں۔

حکام کے مطابق ایونٹ کی پاکستان سے منتقلی کا فیصلہ بنیادی طور پر انتظامی و لاجسٹک مسائل اور خطے کی تمام اہم ٹیموں کی ایونٹ میں شرکت کو ہر صورت یقینی بنانے کے لیے کیا گیا ہے۔ علاوہ ازیں، بعض بین الاقوامی ٹیموں کو پاکستان کے سفر کے حوالے سے درپیش سفری پابندیوں اور سیکیورٹی تحفطات کو بھی وینیو کی تبدیلی کی اہم وجہ بتایا گیا ہے۔ واضح رہے کہ تیسرا ٹی ٹوئنٹی وہیل چیئر کرکٹ ایشیا کپ ۲۹ ستمبر سے کراچی اور حیدرآباد کے اسٹیڈیمز میں کھیلے جانے کا شیڈول طے تھا، تاہم انتظامی مسائل کی وجہ سے یہ ایونٹ اس سے قبل بھی دو مرتبہ ملتوی کیا جا چکا ہے۔

انٹرنیشنل کونسل آف وہیل چیئر کرکٹ کے مطابق آئندہ چند دنوں میں منعقد ہونے والے اجلاس میں ایشیا کپ کے نئے غیر جانبدار وینیو، نئی تاریخوں اور ٹورنامنٹ میں حصہ لینے والی ۶ ٹیموں کا باضابطہ اور تفصیلی اعلان کیا جائے گا۔ کونسل حکام نے واضح کیا کہ اس فیصلے سے پاکستان میں دیگر بین الاقوامی میچز متاثر نہیں ہوں گے اور انٹرنیشنل کونسل آف وہیل چیئر کرکٹ پاکستان میں آئندہ ہونے والی ورلڈ سیریز اور دو طرفہ (بائی لیٹرل) سیریز کی میزبانی کے حقوق پاکستان کے پاس ہی برقرار رکھے گی۔