آئی سی سی ٹیسٹ رینکنگ میں پاکستان کی ایک درجے تنزلی، قومی ٹیم نویں نمبر پر چلی گئی

انٹرنیشنل کرکٹ کونسل (ICC) کی جانب سے جاری کردہ تازہ ترین ٹیسٹ رینکنگ میں پاکستان کرکٹ ٹیم کی کارکردگی میں ایک درجے تنزلی دیکھنے میں آئی ہے، جس کے بعد قومی ٹیم رینکنگ میں نویں نمبر پر چلی گئی ہے۔ تازہ ترین درجہ بندی کے مطابق پاکستان ٹیم کی ریٹنگ پوائنٹس کم ہو کر 71 رہ گئی ہے، جبکہ ویسٹ انڈیز کی ٹیم ایک درجے بہتری کے ساتھ اب پاکستان کو پیچھے چھوڑتے ہوئے آٹھویں پوزیشن پر براجمان ہو چکی ہے۔

آئی سی سی کی جانب سے جاری کردہ فہرست کے مطابق آسٹریلوی کرکٹ ٹیم اپنی بہترین کارکردگی کا تسلسل برقرار رکھتے ہوئے بدستور عالمی ٹیسٹ رینکنگ میں پہلے نمبر پر موجود ہے۔ جبکہ جنوبی افریقہ کی ٹیم دوسرے، نیوزی لینڈ تیسرے اور بھارتی ٹیم چوتھے نمبر پر برقرار ہے۔ دوسری جانب انگلینڈ کی کرکٹ ٹیم پانچویں پوزیشن پر براجمان ہے، بنگلہ دیش چھٹے اور سری لنکا کی ٹیم ساتویں نمبر پر موجود ہے۔

پاکستان کرکٹ ٹیم کی ٹیسٹ رینکنگ میں مسلسل تنزلی پر کرکٹ شائقین اور سابق کرکٹرز کی جانب سے شدید تشویش کا اظہار کیا جا رہا ہے۔ ٹیسٹ کرکٹ میں حالیہ ناکامیوں اور ہوم گراؤنڈ پر متواتر خراب نتائج کو قومی ٹیم کی اس گرتی ہوئی رینکنگ کی بنیادی وجہ قرار دیا جا رہا ہے، جس کے باعث پاکستان اب فہرست میں نچلے درجے کی ٹیموں کے قریب پہنچ گیا ہے۔