ایران، عراق اور خلیجی ممالک کا آبنائے ہرمز پر بات چیت کرنے کا فیصلہ

مشرقِ وسطیٰ میں تیزی سے بدلتی ہوئی جیو پولیٹیکل صورتِ حال کے درمیان ایک اہم مثبت پیش رفت سامنے آئی ہے۔ ایران، عراق اور خلیجی تعاون کونسل (GCC) کے ممالک نے آبنائے ہرمز کی حفاظت اور علاقائی صورتِ حال پر باضابطہ بات چیت شروع کرنے کا فیصلہ کیا ہے۔ ایرانی وزارتِ خارجہ کے مطابق ایران اور خلیجی ممالک کا اعلیٰ سطح کا اہم اجلاس رواں ہفتے پیر کے روز سلطنتِ عمان میں منعقد ہوگا، جس کا بنیادی مقصد مشترکہ علاقائی سلامتی اور سمندری راستوں کا تحفظ یقینی بنانا ہے۔

ایرانی وزارتِ خارجہ کی جانب سے جاری کردہ بیان میں مؤقف اختیار کیا گیا ہے کہ خطے اور آبنائے ہرمز میں کشیدگی، عدم استحکام اور عالمی سطح پر ایندھن کی قیمتوں میں اضافے کا اصل ذمہ دار امریکہ ہے۔ ترجمان نے واضح کیا کہ ایران نے اپنی قومی سلامتی اور مفادات کے تحفظ کے لیے ضروری اقدامات کیے ہیں، تاہم وہ کشیدگی کے خاتمے کے لیے سفارتی حل کی اہمیت پر یقین رکھتا ہے۔ انہوں نے مزید کہا کہ پائیدار حل کے لیے ضروری ہے کہ دوسرا فریق بھی سنجیدگی کا مظاہرہ کرے کیونکہ یکطرفہ طور پر مذاکرات میں پیش رفت ممکن نہیں ہوتی۔