سعودی وزیر خارجہ کا ترک و قطری وزرائے خارجہ سے رابطہ، علاقائی صورت حال پر گفتگو

سعودی عرب کے وزیرِ خارجہ شہزادہ فیصل بن فرحان نے اہم سفارتی پیش رفت کے تحت ترکیہ اور قطر کے وزرائے خارجہ سے الگ الگ ٹیلی فونک رابطے کیے ہیں۔ خبر ایجنسی کے مطابق سعودی وزیرِ خارجہ اور ترک ہم منصب حاقان فیدان کے درمیان گفتگو میں خطے کی مجموعی اور خصوصاً حالیہ ابھرتی ہوئی سیکیورٹی صورتِ حال پر تفصیلی تبادلہٴ خیال کیا گیا۔ دونوں رہنماؤں نے مشرقِ وسطیٰ میں بڑھتی ہوئی کشیدگی کو کم کرنے اور علاقائی امن کے قیام کے لیے باہمی تعاون جاری رکھنے کے عزم کا اعادہ کیا۔

علاوہ ازیں، سعودی وزیرِ خارجہ فیصل بن فرحان نے قطر کے وزیراعظم و وزیرِ خارجہ شیخ محمد بن عبدالرحمن آل ثانی سے بھی ٹیلی فون پر رابطہ کیا۔ اس گفتگو کے دوران قطری وزیراعظم نے سعودی عرب کی ‘مشرقی-مغربی (ایسٹ ویسٹ) آئل پائپ لائن’ پر ہونے والے ڈرون حملے کی شدید الفاظ میں مذمت کی اور سعودی عرب کی سلامتی و استحکام کے لیے قطر کی مکمل حمایت اور یکجہتی کا اظہار کیا۔