سندھ میں بجلی کی طویل لوڈشیڈنگ پر شرجیل میمن برس پڑے

سندھ کے سینئر صوبائی وزیر شرجیل انعام میمن سندھ میں بجلی کی طویل اور غیر اعلانیہ لوڈشیڈنگ پر کے-الیکٹرک اور بجلی کی تقسیم کار کمپنیوں (ڈسکوز) پر شدید برس پڑے۔ سندھ اسمبلی کے اجلاس میں اظہارِ خیال کرتے ہوئے شرجیل میمن نے کہا کہ کے-الیکٹرک، حیسکو (HESCO) اور سیپکو (SEPCO) عوامی مسائل کے حل میں مکمل ناکام ہو چکی ہیں، اور شدید گرمی و حبس کے موسم میں 18، 18 گھنٹے کی طویل لوڈشیڈنگ کے ذریعے عوام کی زندگی عذاب بنا دی گئی ہے۔

شرجیل میمن نے مرکزی حکومت اور پاور کمپنیوں کو تنقید کا نشانہ بناتے ہوئے کہا کہ صوبے کو اس کے حصے کی گیس اور پانی بھی پورا نہیں دیا جا رہا، جو بدترین گورننس کی مثال ہے۔ اس پر سپیکر سندھ اسمبلی اویس قادر شاہ نے وزیرِ داخلہ کو ہدایت کی کہ وہ 23 ستمبر کو تمام ڈسکوز کے سربراہان کو طلب کر کے اہم اجلاس منعقد کریں۔ واضح رہے کہ اجلاس کے دوران سندھ اسمبلی نے صوبے میں رینجرز کی تعیناتی اور ان کے اختیارات میں مزید ایک سال کی توسیع کی قرارداد کے ساتھ ساتھ بانیِ پاکستان قائد اعظم محمد علی جناحؒ کو خراجِ عقیدت پیش کرنے کی قرارداد بھی متفقہ طور پر منظور کر لی۔