14 ستمبر سے نادرا ویکسینیشن سرٹیفکیٹ کے بغیر بین الاقوامی سفر کی اجازت نہیں ہوگی

ائیرپورٹ ہیلتھ ڈپارٹمنٹ نے بیرونِ ملک سفر کرنے والے مسافروں کے لیے اہم احکامات جاری کرتے ہوئے اعلان کیا ہے کہ 14 ستمبر سے نادرا ویکسینیشن سرٹیفکیٹ کے بغیر کسی بھی بین الاقوامی مسافر کو سفر کی اجازت نہیں ہوگی۔ ہیلتھ ڈپارٹمنٹ کے جاری کردہ باضابطہ اعلامیے میں خصوصاً عمرہ زائرین کو ہدایت کی گئی ہے کہ وہ اپنی روانگی سے قبل نادرا سے منظور شدہ ویکسین کارڈ کا حصول لازمی یقینی بنائیں۔

اعلامیے میں واضح کیا گیا ہے کہ بین الاقوامی مسافروں کی سہولت کے لیے ‘فیڈرل گورنمنٹ سول ڈسپنسری’ کو واحد مجاز مرکز مقرر کیا گیا ہے، جبکہ تمام ایئرلائنز کو پابند کیا گیا ہے کہ وہ بورڈنگ پاس کے اجرا سے قبل عمرہ زائرین کے ویکسینیشن سرٹیفکیٹس کی سخت تصدیق کریں۔ ترجمان نے ائیرپورٹ پر ویکسینیشن کی سہولت حاصل کرنے کے خواہش مند مسافروں کو ہدایت کی ہے کہ وہ پرواز سے کم از کم 6 گھنٹے قبل ایئرپورٹ پہنچیں، جہاں انٹرنیشنل ڈپارچر لاؤنج میں مسافروں کی فوری ویکسینیشن کے ساتھ ساتھ نادرا کی آن لائن رجسٹریشن کا عمل مکمل کیا جائے گا۔