پیٹرولیم مہنگائی پر ٹرانسپورٹرز کا کرائے 5 فیصد مزید بڑھانے کا اعلان

حکومت کی جانب سے پٹرولیم مصنوعات کے نرخوں میں مسلسل اضافے کے بعد آل پاکستان گڈز ٹرانسپورٹ اتحاد نے ملک بھر میں مال برداری کے کرایوں میں مزید 5 فیصد اضافے کا باضابطہ اعلان کر دیا ہے۔ گڈز ٹرانسپورٹ اتحاد کے صدر ملک شہزاد اعوان نے میڈیا سے گفتگو کرتے ہوئے بتایا کہ گزشتہ چار دنوں کے دوران ڈیزل کی قیمت میں 20 روپے اور پیٹرول کی قیمت میں 24 روپے فی لیٹر اضافہ کیا گیا ہے، جبکہ اس سے قبل 20 اگست سے 7 ستمبر کے دوران بھی قیمتوں میں 23 روپے تک اضافہ کیا جا چکا تھا، جس نے ٹرانسپورٹ انڈسٹری کو شدید بحران سے دوچار کر دیا ہے۔

ملک شہزاد اعوان نے پیٹرول اور ڈیزل کی قیمتوں میں روزانہ کی بنیاد پر تبدیلی کے سرکاری فیصلے کو یکسر مسترد کرتے ہوئے یاد دلایا کہ 8 سے 17 اگست کی ملک گیر ہڑتال کے موقع پر وفاقی وزیرِ پٹرولیم اور صوبائی حکومتوں نے یقین دہانی کرائی تھی کہ روزانہ قیمتیں تبدیل کرنے کا طریقہ کار ختم کیا جائے گا۔ انہوں نے خبردار کیا کہ حکومتی یقین دہانی پر ہڑتال 40 دن کے لیے مؤخر کی گئی تھی، جس کی مہلت اگلے ہفتے ختم ہو رہی ہے۔ اگر حکومت نے اپنے معاہدوں پر عمل درآمد نہ کیا تو ملک بھر کے ٹرانسپورٹرز ایک بار پھر مکمل اور غیر معینہ مدت کی ملک گیر ہڑتال پر مجبور ہوں گے۔