سعودی عرب پر ڈرون حملے ، عراقی وزیراعظم نے اعلیٰ فوجی کمانڈر کو برطرف کر دیا

سعودی عرب کی آئل پائپ لائن پر ڈرون حملے کے واقعے کے بعد عراقی وزیراعظم علی فالح الزیدی نے اعلیٰ سطح پر بڑا اقدام اٹھاتے ہوئے جنوبی عراقی صوبے میسان میں فوجی کارروائیوں کی سربراہی کرنے والے کمانڈر کو فوری طور پر عہدے سے برطرف کر دیا ہے۔ عراقی وزیراعظم کے دفتر سے جاری بیان کے مطابق ابتدائی تحقیقات میں اس بات کی تصدیق ہوئی ہے کہ سعودی عرب کو نشانہ بنانے والے حالیہ ڈرون حملے عراقی سرزمین سے ہی کیے گئے تھے، جس کے بعد متعلقہ ملٹری کمانڈر کے خلاف برطرفی کا اقدام عمل میں لایا گیا ہے۔

عراقی فوج کے ترجمان کا کہنا ہے کہ وزیراعظم علی فالح الزیدی نے واقعے کے تمام محرکات، حالات اور اس کے پسِ پردہ فریقین کا سراغ لگانے کے لیے فوری اعلیٰ سطحی تحقیقات کی ہدایت جاری کی ہے اور عزم ظاہر کیا ہے کہ ملوث افراد کے خلاف سخت ترین قانونی و تادیبی کارروائی کی جائے گی۔ مزید برآں، سیکیورٹی صورتِ حال کے مدِ نظر عراق نے احتیاطی تدابیر کے طور پر ایران سے متصل ‘شلمچہ بارڈر کراسنگ’ کو عارضی طور پر بند کر دیا ہے۔ واضح رہے کہ سعودی وزارتِ خارجہ نے عراقی سرحد سے حملہ ہونے کی تصدیق کرتے ہوئے بتایا تھا کہ عراقی وزیراعظم کی خصوصی درخواست پر ہی فی الحال جوابی کارروائی روکی گئی ہے۔