پریذیڈنٹس ٹرافی گریڈ ون کا شیڈول اور سکواڈز کا اعلان، میدان 12 ستمبر سے سجے گا

پاکستان کرکٹ بورڈ (پی سی بی) کی جانب سے پریذیڈنٹس ٹرافی گریڈ ون فرسٹ کلاس ٹورنامنٹ کے باضابطہ شیڈول اور تمام اسکواڈز کا اعلان کر دیا گیا ہے۔ آئندہ سیزن میں مجموعی طور پر 8 قومی ڈیپارٹمنٹل ٹیمیں ٹائٹل کے حصول کے لیے 12 ستمبر سے ایک دوسرے کے خلاف نبرد آزما ہوں گی۔ ٹورنامنٹ کے تمام مقابلے پشاور، ایبٹ آباد، اسلام آباد اور راولپنڈی کے مختلف کرکٹ وینیوز پر منعقد کیے جائیں گے، جن میں عمران خان اسٹیڈیم پشاور، ایبٹ آباد کرکٹ اسٹیڈیم، ڈائمنڈ کرکٹ گراؤنڈ اسلام آباد اور شعیب اختر کرکٹ اسٹیڈیم راولپنڈی شامل ہیں۔

اعلان کردہ شیڈول کے مطابق پریذیڈنٹس ٹرافی میں مجموعی طور پر سات راؤنڈز کھیلے جائیں گے اور ہر راؤنڈ چار فرسٹ کلاس میچز پر مشتمل ہوگا۔ اس طرح ایونٹ کے دوران کل 28 چار روزہ فرسٹ کلاس مقابلے ہوں گے، جس کے بعد پوائنٹس ٹیبل کی ٹاپ دو ٹیموں کے درمیان 24 سے 28 اکتوبر تک پانچ روزہ فائنل معرکہ کھیلا جائے گا۔ اس اہم ترین ڈومیسٹک ٹورنامنٹ میں غنی گلاس، کے آر ایل (KRL)، کنگز مین اکیڈمی، ایم آئی ٹی سلوشنز، او جی ڈی سی ایل (OGDCL)، پی ٹی وی (PTV)، اسٹیٹ بینک آف پاکستان (SBP) اور ایس این جی پی ایل (SNGPL) کی ٹیمیں ٹرافی اٹھانے کے لیے میدان میں اتریں گی