اگست میں ترسیلاتِ زر 3 ارب 70 کروڑ ڈالر رہیں، سالانہ بنیادوں پر 16.5 فیصد اضافہ

کراچی: اسٹیٹ بینک آف پاکستان کے مطابق اگست 2026 میں اوورسیز پاکستانیوں کی جانب سے ترسیلاتِ زر 3 ارب 70 کروڑ ڈالر رہیں، جو ماہانہ بنیادوں پر معمولی 0.7 فیصد اضافے کے ساتھ تقریباً جمود کا شکار رہیں۔

مرکزی بینک کے مطابق اگست میں ترسیلاتِ زر میں سالانہ بنیادوں پر 16.5 فیصد نمو ریکارڈ کی گئی۔

اسٹیٹ بینک کے اعداد و شمار کے مطابق رواں مالی سال 2026-27 کے ابتدائی دو ماہ، جولائی اور اگست، کے دوران مجموعی ترسیلاتِ زر 7 ارب 30 کروڑ ڈالر تک پہنچ گئیں، جبکہ گزشتہ مالی سال کے اسی عرصے میں یہ حجم 6 ارب 40 کروڑ ڈالر تھا۔ یوں سالانہ بنیادوں پر ابتدائی دو ماہ کی ترسیلات میں 14.7 فیصد اضافہ ہوا۔

اگست 2026 میں سعودی عرب سے پاکستان کو 87 کروڑ 35 لاکھ ڈالر کی ترسیلات موصول ہوئیں، جبکہ متحدہ عرب امارات سے 74 کروڑ 98 لاکھ ڈالر بھیجے گئے۔

اعداد و شمار کے مطابق برطانیہ سے 56 کروڑ 37 لاکھ ڈالر جبکہ امریکا سے 30 کروڑ 89 لاکھ ڈالر پاکستان موصول ہوئے۔