پاکستان سٹاک ایکسچینج میں کاروبار کا منفی زون میں آغاز

کراچی: پاکستان سٹاک ایکسچینج (PSX) میں کاروباری ہفتے کے پہلے روز شدید مندی کا رجحان دیکھا گیا، جس کے نتیجے میں کے ایس ای-100 (KSE-100) انڈیکس ایک لاکھ 75 ہزار پوائنٹس کی نفسیاتی حد سے نیچے آ گیا۔

کاروبار کے آغاز سے ہی مارکیٹ میں فروخت کا دباؤ نظر آیا اور 800 سے زائد پوائنٹس کی کمی ریکارڈ کی گئی، جس سے ہنڈرڈ انڈیکس گر کر یکدم 1 لاکھ 74 ہزار 470 پوائنٹس کی سطح پر آ گیا۔ معاشی تجزیہ کاروں کے مطابق سرمائے کا انخلاء اور بین الاقوامی و علاقائی صورتحال کے اثرات مارکیٹ کے منفی رجحان کی بنیادی وجوہات ہیں۔

واضح رہے کہ گزشتہ کاروباری ہفتے کے آخری روز پاکستان سٹاک مارکیٹ میں ہنڈرڈ انڈیکس مثبت و مستحکم پیش رفت کے بعد 1 لاکھ 75 ہزار 328 پوائنٹس کی سطح پر بند ہوا تھا، تاہم نئے ہفتے کے ابتدائی سیشن میں ہی سرمایہ کاروں کی محتاط حکمتِ عملی کے باعث انڈیکس میں نمایاں کمی دیکھنے میں آئی ہے۔