ویمنز ٹی 20 ایشیا کپ: بھارت نے پاکستان کو بآسانی شکست دے دی

ویمنز ٹی 20 ایشیا کپ کے اہم اور روایتی ٹکراؤ میں بھارتی ویمنز کرکٹ ٹیم نے پاکستان کو ایک طرفہ مقابلے کے بعد 7 وکٹوں سے شکست دے دی ہے۔ میچ میں پہلے بیٹنگ کرتے ہوئے پاکستانی ویمنز ٹیم بھارتی بولرز کی نپی تلی بولنگ کے سامنے شدید مشکلات کا شکار رہی اور پوری ٹیم صرف 55 رنز پر آل آؤٹ ہو گئی۔ پاکستان کی جانب سے شوال ذوالفقار 14 اور منیبہ علی 13 رنز بنا کر نمایاں رہیں، تاہم ان کے علاوہ کوئی بھی بیٹر بھارتی بولنگ کا مقابلہ نہ کر سکی۔ جواب میں بھارتی ٹیم نے 56 رنز کا آسان ہدف محض 3 وکٹوں کے نقصان پر حاصل کر لیا، جس میں کپتان ہرمن پریت کور نے 18 رنز کی ذمہ دارانہ اننگز کھیلی جبکہ دیپتی شرما اور شفالی ورما نے 12، 12 رنز بنا کر ٹیم کی فتح میں اہم کردار ادا کیا۔ اس کامیابی کے ساتھ بھارتی ویمنز ٹیم نے ٹورنامنٹ میں اپنی مسلسل پیشقدمی جاری رکھی ہے، جو اس سے قبل تھائی لینڈ اور ہانگ کانگ کو بھی شکست دے چکی ہے۔ دوسری جانب پاکستان، جس نے اپنے پہلے میچ میں تھائی لینڈ کو 35 رنز سے ہرایا تھا، اب 7 ستمبر کو اپنے اگلے گروپ میچ میں ہانگ کانگ کے مقابل آئے گا۔