رضوان اور امام کیلئے بورڈ کا شکنجہ تیار، سخت کارروائی کا امکان

دورۂ انگلینڈ کے لارڈز ٹیسٹ میں 194 رنز کی ہزیمت آمیز شکست کے بعد واپس پاکستان بھیجے جانے والے اوپنر امام الحق اور وکٹ کیپر محمد رضوان کو پاکستان کرکٹ بورڈ (پی سی بی) کی جانب سے سخت تادیبی کارروائی کا سامنا کرنا پڑ سکتا ہے۔ اطلاعات کے مطابق لارڈز ٹیسٹ میں پنڈلی کی تکلیف کے باعث دونوں اننگز میں بیٹنگ نہ کرنے پر پی سی بی کی عالمی سطح پر جگ ہنسائی ہوئی، جس کے بعد امام الحق کے خلاف اعلیٰ سطح کی تحقیقاتی کمیٹی بنانے کا فیصلہ کیا گیا ہے جس کے نتیجے میں ان پر ایک سے دو سال کی پابندی بھی لگ سکتی ہے۔ دوسری جانب دوسری اننگز میں انتہائی غیر ذمہ دارانہ شاٹ کھیل کر آؤٹ ہونے والے محمد رضوان بھی بورڈ کی سخت نگرانی میں ہیں۔ بورڈ کو ان کی جانب سے ڈسپلن کی خلاف ورزی پر شدید تحفظات ہیں اور اطلاعات کے مطابق ون ڈے اور ٹی ٹوئنٹی کے بعد اب انہیں ٹیسٹ فارمیٹ سے بھی باہر کیا جا سکتا ہے۔