مشرق وسطیٰ میں دوبارہ کشیدگی، سٹاک مارکیٹ میں شدید مندی

کراچی: پاکستان سٹاک مارکیٹ میں ہفتے کے پہلے کاروباری روز شدید منفی رجحان ریکارڈ کیا گیا، جس کے نتیجے میں کے ایس ای 100 انڈیکس میں نمایاں کمی دیکھنے میں آئی۔

کاروباری ہفتے کے آغاز پر ہی سٹاک مارکیٹ میں فروخت کے دباؤ کے باعث مندی کا رجحان غالب رہا۔ شروعات میں 600 سے زائد پوائنٹس کی کمی کے ساتھ انڈیکس 1 لاکھ 77 ہزار 66 پوائنٹس کی سطح پر آ گیا۔ دن بھر ٹریڈنگ کے دوران سرمائے کے انخلا اور منفی رجحان برقرار رہنے کی وجہ سے کاروباری روز کے اختتام پر KSE-100 انڈیکس مجموعی طور پر 720 پوائنٹس کی کمی کے ساتھ 1 لاکھ 76 ہزار 975 پوائنٹس کی سطح پر بند ہوا۔

واضح رہے کہ گزشتہ کاروباری ہفتے کے آخری روز پاکستان سٹاک ایکسچینج میں 100 انڈیکس 1 لاکھ 77 ہزار 696 پوائنٹس کی سطح پر بند ہوا تھا۔ معاشی ماہرین کے مطابق مقامی و عالمی معاشی عوامل اور سرمایہ کاروں کی جانب سے منافع کے حصول (Profit-taking) کے باعث مارکیٹ پر دباؤ ریکارڈ کیا گیا۔