ترکیہ کے یوم فتح کے موقع پر پاک ترک دوستی کے نام خصوصی نغمہ جاری

ترکیہ کے 104ویں یومِ فتح کے موقع پر پاکستان فوج کے شعبہ تعلقات عامہ (آئی ایس پی آر) نے پاک ترک دوستی، تاریخی برادرانہ تعلقات اور باہمی محبت کے جذبے سے بھرپور خصوصی نغمہ ”دو دل، ایک جان“ جاری کر دیا ہے۔ اس منفرد نغمے کو پاکستانی فنکاروں عثمان رئیس اور ڈاکٹر مبشرہ حفیظ نے اردو اور ترک زبان کے حسین امتزاج کے ساتھ گایا ہے، جبکہ اس کی موسیقی علی مصطفیٰ نے تیار کی اور کمپوزیشن کامران اللہ خان اور سامعہ گوہر نے ترتیب دی ہے۔ نغمے کی خاص بات یہ ہے کہ اس میں رباب کے ساتھ ترکیہ کے روایتی سازوں ‘باقلاما’ اور ‘دربوکا’ کی دلکش دھنیں شامل کی گئی ہیں جو دونوں برادر ممالک کی مشترکہ ثقافت، تاریخ اور لازوال دوستی کو موسیقائی انداز میں خوبصورتی سے اجاگر کرتی ہیں۔