پاکستان سٹاک ایکسچینج میں کاروباری ہفتے کے دوران منفی رجحان

کراچی: پاکستان اسٹاک ایکسچینج (PSX) میں گزشتہ کاروباری ہفتے کے دوران شدید مندی اور منفی رجحان غالب رہا، جس کے نتیجے میں کے ایس ای-100 انڈیکس میں ہزاروں پوائنٹس کی بڑی کمی ریکارڈ کی گئی۔

ہفتہ وار رپورٹ کے مطابق، کے ایس ای-100 انڈیکس 2 ہزار 938 پوائنٹس کی نمایاں کمی کے بعد 1 لاکھ 77 ہزار 166 کی سطح پر بند ہوا۔ پورے کاروباری ہفتے کے دوران مارکیٹ 5 ہزار 048 پوائنٹس کی وسیع رینج کے درمیان حرکت کرتی رہی، جہاں ہنڈرڈ انڈیکس کی بلند ترین سطح 1 لاکھ 81 ہزار 158 جبکہ کم ترین سطح 1 لاکھ 76 ہزار 110 پوائنٹس رہی۔

حصص بازار میں ہفتے بھر کے دوران مجموعی طور پر 4.22 ارب شیئرز کا لین دین ہوا، جن کی مالیاتی قدر تقریباً 205 ارب روپے رہی۔ مارکیٹ میں مسلسل مندی کے اثرات کی وجہ سے سرمایہ کاروں کے حصص کی مجموعی مالیت یعنی مارکیٹ کیپٹلائزیشن میں 247 ارب روپے کا خسارہ دیکھا گیا، جس کے بعد مارکیٹ کیپٹلائزیشن کم ہو کر 19 ہزار 882 ارب روپے کی سطح پر آ گئی۔