دہشتگردی کے متاثرین کی بلا امتیاز حمایت ضروری ہے، پاکستانی مندوب

اقوام متحدہ میں پاکستان کے مستقل مندوب سفیر عاصم افتخار احمد نے اقوام متحدہ کی ویب سائٹ کے مطابق دہشت گردی سے متاثرہ افراد کے عالمی یادگاری دن کے موقع پر اپنے خصوصی پیغام میں کہا ہے کہ دہشت گردی کے تمام متاثرین کی بغیر کسی تفریق یا بلا امتیاز حمایت انتہائی ضروری ہے۔ اپنے بیان میں پاکستانی مندوب نے دہشت گردی کے خلاف جنگ میں پاکستان کی بے مثال قربانیوں اور متاثرین کے ساتھ مکمل یکجہتی کا اعادہ کیا۔

سفیر عاصم افتخار نے زور دیا کہ پاکستان کی مسلح افواج اور سیکیورٹی اداروں نے اس فتنے کے خاتمے اور وطن عزیز کے امن کے لیے عظیم اور لاثانی قربانیاں پیش کی ہیں۔ انہوں نے عالمی برادری پر زور دیا کہ وہ دہشت گردی کے بڑھتے ہوئے خطرات کا مقابلہ کرنے اور انسدادِ دہشت گردی کے اقدامات کو مؤثر بنانے کے لیے بین الاقوامی سطح پر باہمی تعاون کو فروغ دے۔ اس کے ساتھ ساتھ، پاکستانی مندوب نے بھارتی غیر قانونی مقبوضہ جموں و کشمیر کے غیر متزلزل عوام کی طویل جدوجہد اور عظیم قربانیوں کو بھی دلی خراجِ تحسین پیش کیا۔