وفاقی حکومت نے پٹرول اور ڈیزل پر ڈیلرز مارجن میں اضافہ کر دیا

اسلام آباد: وفاقی حکومت نے پٹرولیم مصنوعات پر ڈیلرز مارجن میں اضافے اور پٹرول و ڈیزل کی قیمتوں میں ردوبدل کی باضابطہ منظوری دیتے ہوئے متعلقہ نوٹیفکیشنز جاری کر دیے ہیں۔وزارتِ پٹرولیم کی جانب سے جاری کردہ نوٹیفکیشن کے مطابق اکنامک کوآرڈینیشن کمیٹی (ECC) کے فیصلے کی وفاقی کابینہ سے توثیق کے بعد پٹرول اور ہائی سپیڈ ڈیزل پر ڈیلرز مارجن میں 1.34 روپے فی لٹر کا اضافہ کر دیا گیا ہے۔ اس اضافے کے بعد ڈیلرز کا مارجن 8.64 روپے سے بڑھ کر 9.98 روپے فی لٹر کی سطح پر پہنچ گیا ہے۔ آئل اینڈ گیس ریگولیٹری اتھارٹی (OGRA) کو اس فیصلے پر فوری عمل درآمد یقینی بنانے کی ہدایت کی گئی ہے۔ مزید برآں، روزانہ کی بنیاد پر قیمتوں کی تعین کاری کے طریقہ کار کے تحت پٹرولیم ڈویژن نے نئی قیمتوں کا بھی اعلان کیا ہے۔ جاری کردہ نوٹیفکیشن کے مطابق پٹرول کی قیمت میں 27 پیسے فی لٹر جبکہ ڈیزل کی قیمت میں 1.64 روپے فی لٹر کا اضافہ کیا گیا ہے۔ اس اضافے کے بعد پٹرول کی نئی قیمت 337.78 روپے فی لٹر اور ہائی سپیڈ ڈیزل کی قیمت 364.70 روپے فی لٹر مقرر کر دی گئی ہے۔ حکومت کے مطابق روزانہ پرائس ریویو کے نظام کے تحت ان نئی قیمتوں کا اطلاق 21 اگست 2026 سے ہوگا۔