لیڈز ٹیسٹ: پہلے روز کا کھیل ختم، انگلینڈ نے 2 وکٹوں کے نقصان پر 112 رنز بنالیے

پاکستان اور انگلینڈ کے درمیان جاری پہلے ٹیسٹ میچ کے پہلے روز کا کھیل ختم ہو گیا ہے، جہاں انگلش ٹیم نے اپنی پہلی اننگز میں 2 وکٹوں کے نقصان پر 112 رنز بنا لیے ہیں۔ انگلینڈ کو پاکستان کی پہلی اننگز کا اسکور برابر کرنے کے لیے مزید 59 رنز درکار ہیں۔ دن کے اختتام پر جو روٹ 37 اور جارڈن کاکس 23 رنز کے ساتھ کریپ پر موجود ہیں۔ پاکستان کی جانب سے محمد عباس اور محمد علی نے ایک، ایک وکٹ حاصل کی۔ انگلش اوپنر ایمیلیو گے 33 اور بین ڈکٹ 15 رنز بنا کر آؤٹ ہوئے۔

اس سے قبل لیڈز کے ہیڈنگلے گراؤنڈ میں انگلش کپتان نے ٹاس جیت کر پہلے بولنگ کا فیصلہ کیا جو درست ثابت ہوا۔ پاکستانی بیٹنگ لائن انگلش باؤلرز کی شاندار باؤلنگ کے سامنے زیادہ دیر نہ ٹھہر سکی اور پوری ٹیم پہلی اننگز میں صرف 171 رنز پر ڈھیر ہو گئی۔ قومی ٹیم کی جانب سے عبداللہ شفیق 61 رنز بنا کر نمایاں رہے جبکہ امام الحق نے 42 رنز کی اننگز کھیلی۔ اس کے علاوہ کپتان سلمان علی آغا نے 21، خرم شہزاد نے 14 اور محمد رضوان نے 12 رنز کا تعاون پیش کیا۔ سعود شکیل اور شان مسعود 5،5 رنز ہی بنا سکے جبکہ اذان اویس اور علی عثمان بغیر کوئی رن بنائے پویلین لوٹ گئے۔

واضح رہے کہ باقاعدہ قائد بابر اعظم انگلی کی انجری کے باعث پہلے ٹیسٹ میچ سے باہر ہو گئے ہیں، جس کی وجہ سے اس میچ میں قومی ٹیم کی قیادت سلمان علی آغا کے سپرد کی گئی ہے۔