ایران نے آبنائے ہرمز کھولنے کیلئے امریکا کے سامنے مطالبات رکھ دیئے

آبنائے ہرمز کی کشادگی کے لیے ایران کے امریکا کے سامنے مطالبات، ‘اسلام آباد مفاہمتی یادداشت’ پر عملدرآمد کا تقاضا ایرانی پارلیمنٹ کے سپیکر اور مرکزی مذاکرات کار محمد باقر قالیباف نے آبنائے ہرمز کو تجارتی جہاز رانی کے لیے دوبارہ کھولنے کے عوض امریکی انتظامیہ کے سامنے اپنے باقاعدہ مطالبات پیش کر دیے ہیں۔امریکی نشریاتی ادارے کی رپورٹس کے مطابق، ایرانی مذاکرات کار محمد باقر قالیباف نے امریکا سے مطالبہ کیا ہے کہ وہ ‘اسلام آباد مفاہمتی یادداشت’ (Islamabad MoU) کے تمام نکات پر من و عن اور مکمل عملدرآمد یقینی بنائے۔ اس اہم یادداشت کے تحت دونوں ممالک نے لبنان سمیت تمام جیو پولیٹیکل محاذوں پر ہر قسم کی فوجی کارروائیاں اور حملے روکنے پر اتفاق کیا تھا، جبکہ ایران نے ایٹمی ہتھیار تیار نہ کرنے کا عزم ظاہر کیا تھا۔ مفاہمتی یادداشت کے مسودے میں امریکا کی جانب سے ایرانی بندرگاہوں اور سمندری حدود کی بحری ناکہ بندی ختم کرنے کی شرط شامل تھی۔ اس کے بدلے ایران نے آبنائے ہرمز میں عالمی تجارتی جہازوں کی محفوظ اور بلامعاوضہ آمد و رفت کی ضمانت دی تھی۔ اس کے علاوہ اس معاہدے کے تحت امریکا نے ایران پر عائد تمام اقتصادی و مالیاتی پابندیوں کے مرحلہ وار خاتمے، منجمد ایرانی فنڈز کی بحالی اور ایران کی جنگ بعد ازاں تعمیرِ نو کے لیے 300 ارب ڈالر کے معاشی منصوبے پر رضامندی کا اظہار کیا تھا۔ تاہم، معاہدے کی مقررہ مدت ختم ہونے کے بعد ایران نے واضح کر دیا ہے کہ جب تک امریکا ان تمام تسلیم شدہ شرائط کی پاسداری نہیں کرتا، آبنائے ہرمز سے تجارتی آمد و رفت بحال نہیں کی جائے گی۔