پاکستان رائفل ٹیم نے ایف کلاس عالمی چیمپئن شپ میں شاندار کارکردگی،اہم کامیابیاں سمیٹ لیں

برطانیہ میں منعقدہ ساتویں ایف کلاس عالمی چیمپئن شپ میں پاکستان رائفل ٹیم نے شاندار اور تاریخی کارکردگی کا مظاہرہ کرتے ہوئے عالمی سطح پر ملک کا نام روشن کر دیا ہے۔ 24 ممالک کے 207 بہترین لانگ رینج شوٹرز پر مشتمل اس عالمی مقابلے میں پاکستان کے لیفٹیننٹ کرنل جنید علی نے تمام حریفوں کو مات دیتے ہوئے انفرادی ایف ٹی آر (F-TR) عالمی چیمپئن بننے کا اعزاز اپنے نام کر لیا۔ انہوں نے مجموعی طور پر 3 طلائی، ایک چاندی اور ایک کانسی کا تمغہ حاصل کیا۔

لیفٹیننٹ جنرل احسن گلریز کی قیادت میں 12 رکنی پاکستانی ٹیم نے 800، 900 اور 1000 یارڈز کے کٹھن مقابلوں اور شدید موسمی حالات کے باوجود مجموعی طور پر 4 طلائی، 4 چاندی اور 5 کانسی کے تمغے جیتے اور ایف ٹی آر کیٹیگری میں سب سے زیادہ تمغے حاصل کرنے والی ٹیم بن گئی۔ سپاہی محمد ولید نے ایک طلائی اور ایک کانسی کا تمغہ جیتا جبکہ انڈر 25 کیٹیگری میں حذیفہ گل نے 3 چاندی اور 2 کانسی کے تمغے حاصل کیے۔ اس کے علاوہ، 11 عالمی ٹیموں کے درمیان ہونے والے سنسنی خیز ٹیم مقابلے میں بھی پاکستان نے بہترین کارکردگی کا مظاہرہ کرتے ہوئے رنر اپ (دوسری) پوزیشن اور سلور میڈل حاصل کیا، جو صرف تین سال کے مختصر عرصے میں ایف کلاس شوٹنگ میں پاکستان کے عالمی طاقت بننے کا واضح ثبوت ہے۔