منٹ کی وہ ورزش جو 90 منٹ کی سائیکلنگ سے زیادہ فائدہ مند ہوسکتی ہے؛ تحقیق 3

اگر آپ مصروفیت یا سستی کے باعث روزانہ گھنٹوں ورزش کے لیے وقت نہیں نکال پاتے، تو سائنسدانوں نے آپ کے لیے ایک بہترین اور حوصلہ افزا خبر دی ہے۔ ایک مؤقر بین الاقوامی سائنسی جریدے میں شائع ہونے والی جدید تحقیق کے مطابق ورزش کے فوائد حاصل کرنے کے لیے گھنٹوں پسینہ بہانا ضروری نہیں؛ صرف چند منٹ کی انتہائی تیز اور شدید جسمانی سرگرمی (High-Intensity Workout) بھی خون میں ایسی نمایاں حیاتیاتی اور کیمیائی تبدیلیاں لا سکتی ہے جو صحت پر اثر انداز ہوتی ہیں۔

سائنسدانوں نے اپنی اس جامع تحقیق میں مختصر دورانیے کی تیز رفتار سائیکلنگ (HIIT) اور معمول کی معتدل رفتار سے کی جانے والی ورزش کے اثرات کا باقاعدہ موازنہ کیا، جس کے نتائج حیران کن ثابت ہوئے۔

تحقیق میں شامل افراد نے ایکسرسائز بائیک پر 30، 30 سیکنڈ کے شدید اور تیز ترین رفتار والے سائیکلنگ کے وقفے کیے، جن کے درمیان 4 منٹ کا وقفہ (آرام) رکھا گیا۔ صرف چند منٹ کی شدید ورزش کے بعد خون کے نمونوں میں 714 پروٹینز میں ڈرامائی اور مثبت تبدیلیاں ریکارڈ کی گئیں۔ اس کے برعکس، معتدل رفتار سے کی جانے والی عام سائیکلنگ کے بعد خون میں صرف 7 پروٹینز میں تبدیلیاں دیکھی گئیں۔اس موازنے نے واضح کیا کہ ورزش کا کل دورانیہ نہیں بلکہ اس کی شدت (Intensity) جسمانی نظام اور میٹابولزم پر گہرا اثر ڈالتی ہے۔

ماہرین کے مطابق اس تحقیق کا مطلب یہ ہرگز نہیں کہ 3 منٹ کی شدید ورزش 90 منٹ کی معتدل ورزش کا کامل متبادل ہے۔ پٹھوں کی مضبوطی، پھیپھڑوں اور طویل برداشت (Endurance) کے لیے معتدل ورزش بھی اہم ہے۔ تاہم، مصروف افراد کے لیے مختصر اور شدید ورزش فائدے کا بہترین ذریعہ ہو سکتی ہے۔

ماہرین نے واضح کیا ہے کہ ہائی انٹینسٹی ایکسرسائز (HIIT) ہر شخص کے لیے یکساں موزوں نہیں ہو سکتی۔ وہ افراد جو طویل عرصے سے سست طرزِ زندگی گزار رہے ہیں، کسی قلب یا بلڈ پریشر کے مریض ہیں، انہیں تیز ورزش شروع کرنے سے قبل ڈاکٹر سے مشورہ ضرور کرنا چاہیے۔