پاکستان ویمنز ٹیم ایشین نیٹ بال چیمپئن شپ 2026 کے فائنل میں پہنچ گئی

ہانگ کانگ میں جاری ویمنز ایشین نیٹ بال چیمپئن شپ 2026 میں پاکستان ویمنز ٹیم نے شاندار کارکردگی کا مظاہرہ کرتے ہوئے پلیٹ ڈویژن کے فائنل کے لیے کوالیفائی کر لیا ہے۔ قومی ٹیم نے سیمی فائنل کے انتہائی اہم معرکے میں جاپان کو 25-53 کے واضح اور یکطرفہ مارجن سے شکست دے کر فائنل کا ٹکٹ حاصل کیا۔

سیمی فائنل کے دوران پاکستانی کھلاڑیوں نے زبردست حکمتِ عملی اور بہترین آن فیلڈ ہم آہنگی کا مظاہرہ کیا۔ صبا نور انور، لیا رضا شاہ، حنا چوہدری، سرینا نسیم، جسمین، فرح، نورالعین اور سمایا صفدر نے شاندار کھیل پیش کرتے ہوئے جاپانی ٹیم پر ابتدائی منٹوں سے ہی اپنا دباؤ برقرار رکھا اور فتح اپنے نام کی۔

پاکستان ویمنز نیٹ بال ٹیم کا فائنل میں سنسنی خیز مقابلہ ہفتہ کو تھائی لینڈ کے خلاف ہوگا۔ اس شاندار کامیابی اور فائنل میں رسائی پر پاکستان نیٹ بال فیڈریشن کے چیئرمین ظفر اقبال اعوان، صدر ملک امین خان اور سیکریٹری محمد ریاض نے تمام کھلاڑیوں، کوچنگ اسٹاف اور ٹیم آفیشلز کو دلی مبارکباد پیش کی اور فیصلہ کن مقابلے میں فتح کے لیے نیک تمناؤں کا اظہار کیا ہے۔