انگلینڈ کے خلاف پہلے ٹیسٹ سے قبل بابر اعظم پریکٹس میچ کے دوران دائیں ہاتھ پر گیند لگنے سے زخمی

انگلینڈ کے خلاف اہم ٹیسٹ سیریز سے قبل قومی ٹیم کو بڑا دھچکا لگا ہے، جہاں کاؤنٹی کرکٹ کلب کینٹ میں جاری تین روزہ پریکٹس میچ کے دوسرے روز بیٹنگ کے دوران بابر اعظم دائیں ہاتھ پر گیند لگنے سے زخمی ہو گئے۔ تیز گیند لگنے کے باعث بابر اعظم کے دائیں ہاتھ میں شدئد تکلیف محسوس ہوئی، جس کے فوری بعد ٹیم ڈاکٹر نے گراؤنڈ میں ان کا ابتدائی معائنہ کیا۔ احتیاطی تدابیر کے طور پر ٹیم مینجمنٹ اور طبی عملے نے انہیں مزید بیٹنگ کرنے سے روک دیا، جبکہ ڈاکٹرز کی ہدایت پر بابر اعظم نے پریکٹس میچ کے باقی حصے سے آرام کا فیصلہ کیا ہے۔

ٹیم مینجمنٹ اور میڈیکل سٹاف ڈاکٹر کی نگرانی میں بابر اعظم کی انجری کی صورتحال کا مسلسل جائزہ لے رہے ہیں تاکہ پہلے ٹیسٹ میچ سے قبل ان کی کامل فٹنس کو یقینی بنایا جا سکے۔ ذرائع کے مطابق انجری زیادہ سنگین نہیں ہے اور احتیاطی اقدامات کے تحت اب بابر اعظم 17 اگست کو ہیڈنگلے کرکٹ گراؤنڈ میں قومی ٹیم کے مشق سیشن میں شرکت کریں گے۔ یاد رہے کہ پاکستان اور انگلینڈ کے درمیان تین ٹیسٹ میچوں کی سیریز کا پہلا مقابلہ 19 اگست سے ہیڈنگلے، لیڈز میں کھیلا جائے گا۔