سعودیہ، ترکیہ اور پاکستان کا دفاعی معاہدہ علاقائی استحکام کیلئے اہم ہے: فلسطینی صدر

ترکیہ کے دارالحکومت انقرہ میں ترکیہ کے صدر رجب طیب اردوان اور فلسطینی صدر محمود عباس کے درمیان ایک اہم ملاقات ہوئی، جس میں دونوں رہنماؤں نے خطے کی تازہ ترین سیاسی و سیکیورٹی صورتحال، خصوصاً سعودی عرب، ترکیہ اور پاکستان کے درمیان طے پانے والے تاریخی ‘مکہ دفاعی معاہدے’ (Mecca Joint Defence Agreement) پر تفصیلی تبادلہ خیال کیا۔

ملاقات کے دوران فلسطینی صدر محمود عباس نے ترکیہ کی جانب سے فلسطینی عوام کے لیے مسلسل سیاسی و سفارتی حمایت اور غزہ کے مظلومین کے لیے انسانی و طبی امداد کی مسلسل فراہمی پر صدر اردوان اور ترکیہ کی عوام کا شکریہ ادا کیا۔ انہوں نے کہا کہ سعودی عرب، ترکیہ اور پاکستان کے درمیان ‘مکہ دفاعی معاہدہ’ علاقائی سلامتی، باہمی دفاع اور استحکام کے لیے انتہائی اہم اور خوش آئند پیش رفت ہے۔ محمود عباس نے مقبوضہ مشرقی یروشلم اور مغربی کنارے میں جاری غیر قانونی اسرائیلی آبادکاری پر شدید تشویش کا اظہار کرتے ہوئے واضح کیا کہ “غزہ فلسطینی ریاست کا ایک ناقابلِ تقسیم حصہ ہے اور غزہ کے بغیر کوئی آزاد فلسطینی ریاست وجود میں نہیں آ سکتی۔”

اس موقع پر ترک صدر رجب طیب اردوان نے فلسطینی قیادت کو یقین دہانی کرائی کہ ترکیہ ہر عالمی و علاقائی فورم پر فلسطینی عوام کے جائز حقوق کا دفاع جاری رکھے گا۔ انہوں نے کہا کہ غزہ کی پائیدار اور جامع تعمیرِ نو فوری طور پر شروع کرنے کے لیے پہلے علاقے میں سازگار حالات کا پیدا ہونا اور پائیدار امن کا قیام انتہائی ضروری ہے۔ دونوں رہنماؤں نے فلسطین میں قیامِ امن کے لیے بین الاقوامی سطح پر کوششیں تیز کرنے کے عزم کا بھی اعادہ کیا۔