پاکستان میں قرضوں میں اضافے کی شرح 20 سال کی کم ترین سطح پر آ گئی: وزارت خزانہ کی رپورٹ

وزارتِ خزانہ کی جانب سے جاری کردہ تازہ رپورٹ کے مطابق مالی سال 2025-26 میں پاکستان کے قرضوں میں اضافے کی شرح 20 سال کی کم ترین سطح 7.7 فیصد پر آ گئی ہے، جبکہ گزشتہ دو دہائیوں کے دوران قرضوں میں اضافے کی سالانہ اوسط شرح 16 فیصد رہی تھی۔ رپورٹ کے مطابق مجموعی ملکی پیداوار (GDP) سے قرضوں کا تناسب کم ہو کر 68.3 فیصد رہ گیا ہے، جو 2022-23 میں 75 فیصد اور 2019 سے 2021 کے دوران 86 سے 88 فیصد تک پہنچ گیا تھا۔ اس کے علاوہ بیرونی قرضوں کا جی ڈی پی سے تناسب بھی 21.5 فیصد پر آ گیا ہے جو کہ گزشتہ 9 سال کی کم ترین سطح ہے۔

معاشی اشاریوں میں بہتری کی تفصیلات بتاتے ہوئے رپورٹ میں کہا گیا ہے کہ پاکستان کے زرمبادلہ کے ذخائر 2.9 ارب ڈالر سے بڑھ کر 18.4 ارب ڈالر تک پہنچ چکے ہیں۔ پاکستان نے 4.72 ٹریلین روپے کے واجب الادا قرضے مقررہ مدت سے قبل ادا کیے ہیں، جس سے ایک سال میں سود کے اخراجات میں تقریباً 2 ٹریلین روپے کی نمایاں کمی واقع ہوئی ہے اور حکومتی آمدنی میں سے سود کی ادائیگیوں کا بوجھ 61 فیصد سے گھٹ کر 35 فیصد پر آ گیا ہے۔

وزارتِ خزانہ کے مطابق پاکستان نے مسلسل تین سال پرائمری بجٹ سرپلس حاصل کیا ہے اور 4 سال بعد عالمی کیپٹل مارکیٹ میں کامیاب واپسی کی ہے، جہاں پاکستان کے ‘پانڈا بانڈ’ (Panda Bond) کی طلب جاری کردہ حجم سے 5 گنا زیادہ رہی۔ ان مثبت پیش رفتوں کے نتیجے میں عالمی درجہ بندی کے ادارے S&P نے پاکستان کی کریڈٹ ریٹنگ کو اپ گریڈ کر کے ‘B Stable’ کر دیا ہے، جو کہ گزشتہ 9 سال میں ملک کی بلند ترین کریڈٹ ریٹنگ ہے۔