مغرب ممالک نے روسی تجارتی جہاز قبضے میں لئے تو بھرپور جواب دیں گے: پوتن

روسی صدر ولادیمیر پوتن نے خبردار کیا ہے کہ اگر مغربی ممالک نے روس کے تجارتی بحری جہازوں کو قبضے میں لینے کے منصوبے پر عمل کیا تو ماسکو بھی اسی نوعیت کا سخت اور مساوی جوابی اقدام کرے گا۔ روسی بحریہ کے اہلکاروں سے گفتگو کرتے ہوئے صدر پوتن نے واضح کیا کہ روس کا ممکنہ ردعمل صرف انہی خطوں تک محدود نہیں رہے گا جہاں روسی جہازوں کو قبضے میں لیا جائے گا، بلکہ ماسکو جہاں بھی مناسب اور ضروری سمجھے گا وہاں کارروائی کا حق محفوظ رکھتا ہے، جس میں روسی پیسیفک فلیٹ (Pacific Fleet) کا دائرہ اختیار بھی شامل ہے۔

صدر پوتن نے بحریہ کے اعلیٰ حکام کو اس معاملے پر خصوصی اور ہنگامی توجہ دینے کی ہدایت کرتے ہوئے بتایا کہ وزارت دفاع کو باقاعدہ احکامات جاری کیے جا چکے ہیں اور پیسیفک فلیٹ کی کمان کو بھی صورتحال سے آگاہ کر دیا گیا ہے۔ انہوں نے مزید کہا کہ وہ وزارت دفاع اور بحری کمان کی جانب سے موصول ہونے والی تجاویز کے منتظر ہیں۔ روسی صدر نے زور دیا کہ روس اپنی قومی سلامتی کو یقینی بنانے کے ساتھ ساتھ ہمسایہ و دوست ممالک کے ساتھ باہمی مفادات اور احترام کی بنیاد پر معاہدوں کے لیے تیار ہے، لیکن اپنے تجارتی و بحری مفادات پر کوئی سمجھوتہ نہیں کرے گا۔