سٹاک مارکیٹ میں شدید مندی، انڈیکس ایک لاکھ 80 ہزار پوائنٹس کی حد بھی کھو بیٹھا

پاکستان سٹاک مارکیٹ میں آج کاروبار کے دوران شدید منفی رجحان غالب رہا، جس کے نتیجے میں سرمایہ کاروں کو اربوں روپے کا نقصان برداشت کرنا پڑا۔ کاروباری ہفتے کے دوسرے روز آغاز سے ہی سٹاک ایکسچینج میں مندی کا رجحان دیکھنے میں آیا اور ایک ہزار سے زائد پوائنٹس کی گراوٹ کے ساتھ KSE-100 انڈیکس ایک لاکھ 80 ہزار 76 پوائنٹس کی سطح پر آ گیا۔

دن بھر ٹریڈنگ کے دوران مندی کا یہ سلسلہ برقرار رہا، جس کے باعث کاروباری روز کے اختتام پر ہنڈرڈ انڈیکس مجموعی طور پر 1,463 پوائنٹس کی بڑی کمی کے ساتھ 1 لاکھ 79 ہزار 846 پوائنٹس کی سطح پر بند ہوا۔ واضح رہے کہ گزشتہ کاروباری دن کے اختتام پر بھی سٹاک ایکسچینج میں 119 پوائنٹس کی کمی ریکارڈ کی گئی تھی اور انڈیکس 1 لاکھ 81 ہزار 310 پوائنٹس پر بند ہوا تھا، تاہم آج کی شدید گراوٹ نے مارکیٹ کو مزید نیچے دھکیل دیا ہے۔