یوکرین کا مگ-29 لڑاکا طیارہ گر کرتباہ

جنوبی یوکرین کے علاقے اودیسا میں جنگی مشن کے دوران یوکرینی فضائیہ کا ایک مگ-29 (MiG-29) لڑاکا طیارہ تباہ ہو گیا، تاہم پائلٹ نے بروقت ایجیکٹ کر کے اپنی جان بچا لی۔ یوکرینی فضائیہ کے مطابق 10 اگست کی شام پائلٹ اودیسا ریجن میں فضائی اہداف کو نشانہ بنانے کے مشن پر تھا کہ میزائل داغنے کے دوران طیارے میں شدید ہنگامی صورتحال پیدا ہو گئی۔ ابتدائی رپورٹس کے مطابق حادثے کے بعد طیارے میں آگ بھڑک اٹھی اور وہ کنٹرول سے باہر ہو گیا، جس پر پائلٹ نے محفوظ طریقے سے ایجیکٹ کیا جسے بعد ازاں طبی امداد کے لیے ہسپتال منتقل کر دیا گیا۔ یوکرینی فوج کے مطابق واقعے کی وجوہات معلوم کرنے کے لیے تحقیقات جاری ہیں۔ واضح رہے کہ دو ہفتوں سے بھی کم عرصے میں یوکرینی فضائیہ کو پہنچنے والا یہ دوسرا بڑا نقصان ہے؛ اس سے قبل 29 جولائی کو بھی ایک F-16 لڑاکا طیارہ ہنگامی صورتحال کے باعث تباہ ہو گیا تھا جس کا پائلٹ بھی محفوظ رہا تھا۔