قومی ہاکی ٹیم ورلڈ کپ میں شرکت کے لیے نیدرلینڈ روانہ ہو گئی

پاکستان کی قومی ہاکی ٹیم ایف آئی ایچ مردانہ ہاکی ورلڈ کپ میں شرکت کے لیے لاہور کے علامہ اقبال انٹرنیشنل ایئرپورٹ سے نیدرلینڈز (ہالینڈ) اور بیلجیئم کے لیے روانہ ہو گئی ہے۔

ہاکی ورلڈ کپ 15 سے 30 اگست تک نیدرلینڈز اور بیلجیئم کی مشترکہ میزبانی میں کھیلا جائے گا، جس میں قومی ٹیم عالمی سطح پر پاکستان کی نمائندگی کرے گی۔

پاکستان ہاکی فیڈریشن (PHF) نے ٹیم کی روانگی سے قبل کھلاڑیوں اور آفیشلز کے تمام مالی و لاجسٹک انتظامات مکمل کر لیے ہیں۔ کھلاڑیوں کے حوصلے بلند کرنے اور غیر ملکی اخراجات کے لیے پی ایچ ایف نے 2 کروڑ روپے کا فارن ڈیلی الاؤنس جاری کر کے براہ راست کھلاڑیوں کے بینک اکاؤنٹس میں منتقل کر دیا ہے۔

پی ایچ ایف کے صدر محی الدین وانی کے مطابق کھلاڑیوں اور کوچز کی سفری سہولیات، رہائش اور طعام کے تمام امور شفاف اور بہترین انداز میں ترتیب دیے گئے ہیں تاکہ ٹیم مکمل توجہ کھیل اور کارکردگی پر مرکوز رکھ سکے۔ قومی کھلاڑیوں نے ورلڈ کپ میں فتح اور قوم کی توقعات پر پورا اترنے کے عزم کا اظہار کیا ہے۔