عالمی اور مقامی مارکیٹس میں سونے کی قیمتوں میں مزید اضافہ

عالمی اور مقامی صرافہ مارکیٹوں میں سونے اور چاندی کی قیمتوں میں مسلسل اور نمایاں اضافہ ریکارڈ کیا گیا ہے، جس کے نتیجے میں فی تولہ سونا اور چاندی نئ بلندیوں پر پہنچ گئے۔

بین الاقوامی بلین مارکیٹ میں فی اونس سونے کی قیمت میں 51 ڈالر کا بڑا اضافہ ہوا، جس کے بعد عالمی قیمت 4 ہزار 319 ڈالر فی اونس کی سطح پر آ گئی۔ عالمی منڈی میں اس غیر معمولی اضافے کے اثرات مقامی صرافہ مارکیٹوں میں بھی دیکھے گئے، جہاں فی تولہ سونے کی قیمت 5 ہزار 100 روپے بڑھ کر 4 لاکھ 54 ہزار 336 روپے ہو گئی۔ اسی طرح فی دس گرام سونے کی قیمت میں 4 ہزار 372 روپے کا اضافہ ہوا، جس سے نئی قیمت 3 لاکھ 89 ہزار 519 روپے ہو گئی۔

دوسری جانب عالمی مارکیٹ میں فی اونس چاندی کی قیمت 2 ڈالر 80 سینٹس کے اضافے سے 64 ڈالر 60 سینٹس پر پہنچ گئی۔ عالمی سطح پر قیمتی دھات کی قدر بڑھنے پر مقامی مارکیٹ میں بھی فی تولہ چاندی 280 روپے کے اضافے سے 6 ہزار 939 روپے اور فی دس گرام چاندی 240 روپے مہنگی ہو کر 5 ہزار 949 روپے کی سطح پر بند ہوئی۔