ہسپتال بنانے کا اختیار صوبوں کے پاس ہے، وفاق اپنی ڈسپنسریاں اپ گریڈ کر سکتا ہے: مصطفیٰ کمال

وفاقی وزیر صحت مصطفیٰ کمال نے واضح کیا ہے کہ 18ویں آئینی ترمیم کے بعد ہسپتال بنانے اور ان کی دیکھ بھال کا اختیار تمام تر وسائل کے ساتھ صوبوں کو منتقل ہو چکا ہے، جس کے باعث وفاقی وزیر ہونے کے ناطے وہ سندھ یا کراچی میں نئے ہسپتال قائم کرنے کا اختیار نہیں رکھتے۔ کراچی میں جیکب لائنز ڈسپنسری کو 30 بستروں کے جدید اور 24 گھنٹے فعال ہسپتال میں تبدیل کرنے کے منصوبے کی افتتاحی تقریب سے خطاب کرتے ہوئے انہوں نے اعلان کیا کہ وفاقی حکومت نے شہر کی 05 غیر فعال یا محدود خدمات فراہم کرنے والی ڈسپنسریوں (بشمول ایئرپورٹ اور گارڈن ڈسپنسری) کی اپ گریڈیشن کے لیے 02 ارب 86 کروڑ 50 لاکھ روپے مختص کیے ہیں۔ مصطفیٰ کمال نے کراچی کے شہریوں سے معذرت کرتے ہوئے کہا کہ اگر ان کے اختیار میں ہوتا تو وہ کورنگی اور لیاقت آباد جیسے گنجان آباد علاقوں میں نئے ہسپتال بناتے، تاہم وفاق کے زیر انتظام طبی مراکز کی بحالی اور اپ گریڈیشن کا کام آئندہ 03 ماہ میں مکمل کر لیا جائے گا۔