اسحاق ڈار کا عمانی ہم منصب سے ٹیلیفونک رابطہ، دوطرفہ تعاون بڑھانے پر اتفاق

ئب وزیراعظم اور وزیر خارجہ سینیٹر محمد اسحاق ڈار کا عمان کے وزیر خارجہ کے ساتھ ٹیلیفونک رابطہ ہوا ہے، جس میں دوطرفہ تعلقات اور باہمی دلچسپی کے امور پر تفصیلی تبادلہ خیال کیا گیا۔

دفتر خارجہ کے ترجمان کے مطابق، گفتگو کے دوران عمانی وزیر خارجہ نے اپنے دورۂ پاکستان کے موقع پر شاندار اور پرتپاک میزبانی فراہم کرنے پر نائب وزیراعظم اسحاق ڈار کا شکریہ ادا کیا۔ دونوں ممالک کے وزرائے خارجہ نے تجارت، سرمایہ کاری اور توانائی کے اہم شعبوں میں دوطرفہ تعاون کو مزید فروغ دینے کے لیے دورے کے دوران طے پانے والے فیصلوں پر عملی پیش رفت کو یقینی بنانے پر اتفاق کیا۔ ترجمان نے بتایا کہ دونوں رہنماؤں نے دوطرفہ تعلقات میں مثبت پیش رفت کا تسلسل برقرار رکھنے کے لیے اعلیٰ سطح کے سیاسی روابط اور ایک دوسرے کے ملک کے دورے جاری رکھنے کی اہمیت پر بھی زور دیا۔ اس کے علاوہ، دونوں وزرائے خارجہ نے خطے کی موجودہ عسکری و سیاسی صورتحال پر بھی غور کیا اور خطے میں پائیدار امن و استحکام کے فروغ کے لیے اپنے مشترکہ عزم کا اعادہ کیا۔