ایف آئی اے کی کارروائی، جعلی ادویات تیار کرنے والا نیٹ ورک بے نقاب

وفاقی تحقیقاتی ادارے (ایف آئی اے) نے بلدیہ ٹاؤن کے علاقے میں ایک بڑی اور کامیاب کارروائی کرتے ہوئے جعلی ادویات تیار کرنے والے نیٹ ورک کا بھانڈا پھوڑ دیا ہے۔ ایف آئی اے کے ترجمان کے مطابق چھاپے کے دوران گودام سے کروڑوں روپے مالیت کی جعلی ادویات، خام مال، تیاری میں استعمال ہونے والی بھاری مشینری اور دیگر سامان قبضے میں لے لیا گیا ہے۔ ترجمان نے مزید بتایا کہ ملزمان معروف ادویہ ساز کمپنیوں کا نام، جعلی پیکنگ اور برانڈز کا غیر قانونی استعمال کر کے بڑے پیمانے پر جعلی جنسی ادویات تیار کر کے مارکیٹ میں سپلائی کر رہے تھے۔ ایف آئی اے نے تمام شواہد اور سامان تحویل میں لے کر نیٹ ورک میں ملوث ملزمان کے خلاف متعلقہ قوانین کے تحت قانونی کارروائی اور تفتیش کا آغاز کر دیا ہے۔