امریکا: 53 برس بعد بوتل میں بند پیغام مل گیا

امریکہ کی ریاست نیو جرسی میں دلدلی علاقے کی صفائی کے دوران ایک شہری کو 53 سال قبل سمندر میں بہائی گئی بوتل میں بند مزاحیہ پیغام ملا ہے، جو اس وقت کی 9 سالہ بچی نے لکھا تھا۔ دی ٹائیڈ لینڈز انیشی ایٹو کے شریک بانی جان کاؤٹرمین کو اپر ٹاؤن شپ میں صفائی کے دوران 20 اگست 1973 کا لکھا ہوا لاری بلیئر کا پیغام ملا، جس میں اغوا کی ایک فرضی اور مزاحیہ کہانی تحریر کی گئی تھی۔ جان کاؤٹرمین کی جانب سے سوشل میڈیا پر تصویر شیئر کیے جانے کے بعد یہ پیغام لاری کی بڑی بہن ایلیسن اسپینسر تک پہنچ گیا۔ ایلیسن کے مطابق اس وقت وہ 16 سال کی تھیں اور انہوں نے اپنی بہن کی فرمائش پر بہتر لکھائی کے باعث یہ پیغام تحریر کر کے اوشن سٹی کے ساحل سے سمندر میں بہایا تھا۔