ہیپاٹائٹس کے خاتمے کیلئے سب کو مل کر کردار ادا کرنا ہوگا: مریم نواز

وزیراعلیٰ پنجاب مریم نواز شریف نے عالمی یومِ ہیپاٹائٹس کے موقع پر قوم کے نام اپنے پیغام میں کہا ہے کہ ہیپاٹائٹس کے مکمل خاتمے کے لیے حکومت، طبی عملے اور عوام کو مل کر کردار ادا کرنا ہوگا۔ انہوں نے واضح کیا کہ شہریوں کو ہیپاٹائٹس کی مفت سکریننگ اور علاج کی فراہمی حکومت کی اولین ترجیح ہے، جس کے تحت موبائل ہسپتالوں کے ذریعے عوام کو ان کی دہلیز پر ٹیسٹنگ کی سہولت دی جا رہی ہے۔ وزیراعلیٰ نے بتایا کہ مریضوں پر مالی بوجھ ڈالے بغیر مفت تشخیص و علاج یقینی بنایا جا رہا ہے، جبکہ غیر معیاری سرنجز کی تیاری اور ان کے دوبارہ استعمال پر سخت پابندی عائد کر دی گئی ہے۔ انہوں نے مزید کہا کہ تمام سرکاری ہسپتالوں میں حفظانِ صحت کے اصولوں پر عملدرآمد جاری ہے اور عوام کو بروقت سکریننگ کروا کر صحت مند پاکستان کی تعمیر میں حصہ لینے کی اپیل کی ہے۔