چوتھا ٹی 20: پاکستان انڈر 19 ویمنز نے جنوبی افریقا کو ہرا کر سیریز 2-2 سے برابر کردی

پاکستان ویمن انڈر 19 کرکٹ ٹیم نے ہوم گراؤنڈ پر بہترین کھیل کا مظاہرہ کرتے ہوئے چوتھے ٹی 20 میچ میں جنوبی افریقا ویمن انڈر 19 کو سنسنی خیز مقابلے کے بعد 6 وکٹوں سے شکست دے دی ہے۔ اس کامیابی کے ساتھ ہی پاکستان نے 5 میچز پر مشتمل ٹی 20 سیریز 2-2 سے برابر کر دی ہے، جس کے بعد سیریز کا آخری اور فیصلہ کن معرکہ جمعہ کی شب کھیلا جائے گا۔

کراچی کے نیشنل بینک اسٹیڈیم میں کھیلے گئے چوتھے میچ میں جنوبی افریقا کی ٹیم نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 8 وکٹوں کے نقصان پر 109 رنز بنائے۔ مہمان ٹیم کی جانب سے شیری سبیا 30 رنز بنا کر نمایاں رہیں جبکہ ڈیڈرے وین ریننسبرگ اور کرس ماری بیزوئیڈن نے 23، 23 رنز کی مزاحمتی اننگز کھیلی۔ پاکستان کی جانب سے بالنگ میں ماہ نور زیب نے 18 رنز دے کر 2 اور روزینہ اکرم نے 21 رنز کے عوض 2 وکٹیں حاصل کیں، جبکہ ذوفشاں ایاز، ماہ نور اور شہربانو کے حصے میں ایک ایک وکٹ آئی۔

110 رنز کے ہدف کے تعاقب میں پاکستان کی شروعات اچھی رہی جہاں اوپنر رویل خان نے 18 اور کومل خان نے 28 رنز کا آغاز فراہم کیا۔ تاہم، درمیانی اوورز میں مسلسل وکٹیں گرنے کے باعث قوم ٹیم 43 رنز پر 4 وکٹیں گنوا کر دباؤ میں آ گئی۔ ایسے موقع پر پلیئر آف دی میچ ذوفشاں ایاز نے کپتان فضا فیاض کے ساتھ مل کر ناقابلِ شکست 70 رنز کی فیصلہ کن شراکت قائم کی۔

ذوفشاں ایاز نے جارحانہ انداز اپناتے ہوئے صرف 29 گیندوں پر 5 چوکوں اور ایک چھکے کی مدد سے 44 رنز کی ناٹ آؤٹ اننگز کھیلی اور آخری اوور کی دوسری گیند پر چھکا لگا کر ٹیم کو فتح دلائی۔ کپتان فضا فیاض نے بھی ذمہ دارانہ بیٹنگ کرتے ہوئے 27 گیندوں پر 4 چوکوں کے ساتھ 28 ناٹ آؤٹ رنز بنا کر ٹیم کو 19.2 اوورز میں کامیابی سے ہمکنار کرایا۔ سیریز کا فیصلہ کن پانچواں میچ جمعہ کو اسی میدان پر کھیلا جائے گا۔